•කුඹලා...

 "රහසේම නික්ම යති කුඹලුන්..."

ගේ හදලා..

බිත්තරදාල..

එන පැටවුන්ට ඇති තරම්..

කෑම ගොඩගහලා..

ගේ වහලා යන්නම යනවලු

කුඹලා..

පැටවුන්ගෙන් කිසිවක් නොඉල්ලාම

බලාපොරොත්තු වෙන්නෙම නැතුව..

සොබාදහමට යුතුකම් ඉටුකොට...

පැටවුන්ට සුරක්ෂිත හෙටක් සදා..

උන් නික්මෙනවලු රහසේම...

දරුවන් හදා, දරුවන් වදා..

උන් ජීවිතයම..

තම සතුට කරගෙන..

තම බලාපොරොත්තු ඉටුකොටගෙන..

තමන්ට බැරිවුන හීනද...

දරුවන්ගෙන් දැක සැනහෙන..

පෙරළා යුතුකම් බලාපොරොත්තු 

පොදි ගහගන්න..

මිනිස් මාපියො අතර..

කෙතරම් උතුම්ද..

කුඹලා......

•වැව අසල නිවහන

"වැවක කෙතක නිලක සෙවනක .."

නිල්ල නිලන නිල් කඳුවැටි සෙවනේ..
රැළිති නඟන නිල් වැව දිය කොමලේ..
පහස ලබන කෙත් යායේ ඇසුරේ..
පුංචි කැදැල්ලක උණුහුම දැවටේ..

•මුල

"අතීතෙක දුර ඈත දවසක..."

මල්වතු ඔයේ ඉවුරක
අතීතෙක දුර ඈත දවසක...
නම නොදන්නා උතුම් මිනිසෙකු
පැල කරපු වී අහුර අදටත්
රටක කුසගිනි නිවන අරුමය...

•මීෂා

"මිනිසෙකි නුඹත් නොමිනිසුන් අතර ඉපදුන..."

මීෂා.......

මාවත කොනක ගුලිවී අසරණව

පෙර දිනෙක නුඹ පැමිණ මගෙ දෝතට

සත් වසක් ගෙවුනු තැන අද දිනට

මිනිසුන් වී ඉපිද නොමිනිසුන් වී මියෙන සමයක

නොමිනිසෙකු වී ඉපිද මිනිසෙකු විලස මිය ගිය

දයාබර ලබැඳියේ...

මතු දිනක උඹ ඉපදෙනව සත්තයි

මිනිසෙකුම වී අප අතර...

සුබ ගමන් "මීෂා"...

•ගුරු පියසටහන් 2

"දඩයක්කාර තාත්තා..."

පොව්වාට කිරි පොවන
මුවැත්තියෙ වනු සමා..
උණුහුමේ කිරි උරන
මුව පොව්වො වනු සමා..

මගෙ කෙලීට පොත් අරන්
කොළඹින් එන මහතැන්ල
හරි මනාපයි මුවැත්තියෙ
උඹෙ මසට......

මහතැන්ල හෙට එන්නෙ
හිස් අතින් නොවන්නේ..

මගෙ කෙලිට වගෙම
කෙලීගෙ දුප්පත් ඉස්කෝලෙ
පොඩි එවුන් හැමෝටම
ඒ මහත්තුරු ගේනවා
පොත් පෑන් පැන්සල් සපත්තු හැමදේම..
ලස්ස ගානක බඩුලු....

මහතැන්ල ඉල්ලන්නෙ
එකම එක පොඩි දෙයක්ඒ
 තමයි මේ බැද්දෙ
උඹ වාගෙ දඩ මසක්..

ඉතිං කොහොමෙයි බෑ කියන්නෙ..

මහතැන්ල කරන්නේ
හරිම හරි පිංකමක්..
මුව අම්මෙ, පොඩි පොව්වො,
උඹලත් ඒ පිනට හවුල්
මේ වෙඩි හඬින් පසු..

උඹල ඔක්කොටම පිං සිද්ධ කරගන්න..
දුකක් නෑ මගෙ දූගෙ තාත්තට
පුරෝගන්න මේ පව
අද ගෙවෙන මේ පුන් පෝය දොහේ...

මහතැන්ල ගෙනත් දෙන
පොත් පෙලින් අකුරුකොට
මගෙ කෙලී ඇස් පාදගත් දවසක..
පිං දේවි ඒකිගේ පවුකාර තාත්තට.. 

•සිව් සක සිහිනය

"ජීවිතයේ බර අදින්න... රෝද දෙකට උදව් වෙන්න..."

මෙතුවක් කල් අපි දෙන්නගෙ
ජිවන බර කරට අරන්
ඇද්ද නුඹට උදව් වෙන්න
ඔන්න තවත් කෙනෙක් ඇවිත්

හතර රෝද වලටත් බැරි
මහ බර කඳ කෙඳිරි නොගා
ඇද්ද නුඹට උදව් වෙන්න
ඔන්න තවත් කෙනෙක් ඇවිත්

නෑ බෑ නැති උඹෙයි අපෙයි
සබැඳියාව ගැන කියාලා
හෙට ඉඳලා මෙන්න මෙයත්
හොඳට පුරුදු කරල ගනින්..

උඹට රෝද දෙක උනාට
මෙයාට සිව් සක තිබුනට
උඹයි අයියා උඹයි ලොක්කා
ගනින් මෙයත් හරි පාරට

කවිකාරියි මමයි දෙන්න
මුලින් දැකපු දරුවො දෙන්න
තමයි උඹල ඒක හින්ද
පණ වාගෙයි උඹල දෙන්න..

•අපිට තැනක්

"අපේම අපේම නවාතැනක්..."

කිරි සයුරේ
සූරිය පවුලේ..
නිල් පාට...
පුංචි පෘථිවියේ...
අපේම නවාතැනක්
වෙන්කර ගතිමු අද...